فقدت النطق - عبدالرحمن بلال
الأيام بتعدي بتقل كبير جداً فوق روحك
وماشية ببطئ . .
صحيح لسه النفس شغال ,
لكن يابني انت تقريباً فقدت النُطق .
رجعت تعيش حزين تاني
رجعت بعيد .
مولد وانفض من حواليك
رجعت وحيد .
وأدي الناس اللي كنت زمان بتحكيلهم
وبتعري ليلاتي في ذكريات عدت
ومتطمن !
إن المستحيل إنك تغيب عنهم
وبتطمن !
وبتدمر حياتك عادي علشانهم
ومُستمتع !
أدي الناس اللي كنت زمان مأمنهم
بقيت مرعوب تقابلهم
ولو حبيت تعاتبهم ,
تعاتبهم مع نفسك . .
تكلمهم وتشتمهم وتخلق 100 حوار مـ الوهم
كأنك يابني إتجننت !
وتسمعهم بصوت نفسك
وفي الأخر عشان نفسك تسامحهم .
