مازلت - عبدالرحمن بلال
مازلت عايش في الحياه بكيفي
رغم اللي شوفته في الحياه من ظلم
قادر أكمل لسه في طريقي رغم ان ماتحققش فيه ولا حلم
مازلت بحلم .. ومازلت برضو بكتبك
وأشرب سجاير بإفترى
وأمشي في نفس السكه يمكن ألمحك
وأسمع أغاني لورده كأني بسمعك
وكأن لسه في فرصه تانيه للرجوع . .
وان الدموع إثبات بينهي أي شك . .
وان الفراق عمره ما كان يوم حل
واني بحبك رغم اني مُقتنع , إنك ماحبتنيش ,
وده أساس المشكله
مازلت بفرح بالقليل مـ الصحبه والخروجات
ومازلت ببحث في صميم الذات
عن واد صغير كان زمان مبسوط
يكفيه انه يلعب كوره في الشارع
يكفية ابتسامة شيخ بيشرح درس في الجامع
ينده عليه ويكلمه ويقوله شاطر
عايز أشوفك كل يوم حاضر
اوعي تقصر في الصلاه , مهما الحياه ضاقت عليك
واحفظ إجابة السؤال ده , انا بكره هسأل فيه الحضور
أول ما أقول مين اللي عارف , ارفع ايديك وتعالي جاوب
مازلت فاكر ريحة الراديو وشرايط الحكايات
وحكاوي جدي بإنه هيخليني أسافر
ألعب مصارعه و ألف ع القنوات
وأما أتسأل مين علمك ؟ أقول عجوز بشرب معاه جوزه
علمني أشوف ان الحياه تافه
حبة بشر تايهين في دايره مقفوله
جدي اللي خلاني أعرف أحلم
رغم إنه مكنش قاصد
كنت أقوله هات جنيه وهردهولك لما أكبر 100 جنيه
جدي اللي خلاني أعرف أكتب
رغم إنه مكنش عارف
اني يوماً ما هاجيب سيرته في قصيده وأهديها ليه .
مازلت بكبر ومازلت مش لاقي السعاده
حتي يوم ما حضنتها أنا كنت خايف مـ النهايه
لو عندي قوة خفيه عن كل البشر كنت أقول للوقت يثبت
لو حتي أكمل باقي عمري في حضنها أنا كنت هفرح
ايه أحلي منك في الحياه غير الكتابه ؟
حتي الكتابه رافضه بُعدك .
بحكي فـ مشاكل وفـ تعب
بحكي فـ طفولتي والخُطب
بحكي في 100 موضوع بعيد وألقاني برجع أحكي عنك
مازلت عايش مُكتئب
مازلت ببعد كل يوم عن نفسي قبل ما يبقي عنك
( امتي ترجع )
مطرح ما عيني تبص بلمح كلمتين
مكتوبين . .
علي كل حيطه بشوفها سد
علي كل باب مقفول وكأنه رد
بسمعها في كلام أي حد
مالك يا واد ؟
مطفي ليه ؟
مش عادتك انك تبقي ساكت
فين ضحكتك ؟
فيك حاجه ماتت ؟
اشمعني انا ؟
واشمعني انتي ؟
ما انا كنت عايش عادي يعني
بخرج وبسهر وأشتغل
بكتب لوحدي وأكتئب
محفظتي تفضى تتملي مش فارقه عندي
الدنيا بالنسبالي غنوه وقهوه ساده
فيديو تافه ولا سيلفي ويا صاحب كان معايا
كنت عادي
ايه اللي خلاني أبتسملك ؟
مش عادتي أصلاً أبتسم
أنا شوفت في عنيكي النهار
حسيت بطعم الإنتصار
فكان طبيعي أنهزم
أنا بس حابب أعرفك لو كان يهمك ,
انا حالي بعدك مش تمام
وان الزمن واقف بقاله شهور
وان الأمان ناقصه هيام
وان الاغاني ناقصه غنوه
وان الظروف رافضه ظروفك
وانك بعيده . . وكل يوم في الحلم أشوفك . .
أنا كنت عايش في الحياه بكيفي
أصبحت عايش في الحياه بكيفك .
