اقفل الدايرة - عبدالرحمن بلال

لم اللي فاكره من تجاربك

 واللي فاضل من صحابك 

والتيشرت النص كم إياه . . 

وغيب . 

إقفل الدايره ببرود 

وإن يسألوك إيه غيرك ؟ 

قول النصيب .

مهما تحكي مش هاتسمع غير هاتُفرج . . 

لو غرقت مش هاتلقي إيد تساعدك . . 

فـ انت حاول تلحقك , 

واعرف إن الصحبه وقت . . 

واعرف ان الطيبه ذنب . . 

واعرف ان الجاي أصعب . . 

وان اللي قابلك ع الطريق , بكره يفوتك ع الطريق . 

هون عليك 

لا انت أول حد يزعل ولا حتي ده أخر زعل 

لسه هاتشوف مـ الزمن , حجات يجوز لا تُحتمل . . 

لما هاتفكر في بكره وتترعب 

وتبص حواليك ماتلقيش غير الوجع . . 

وتخاف ترد علي إتصالها ليتعبك !! 

إعرف إن ساعتها بس , إن حزنك إكتمل . 

فإضحك بقي , 

منتاش لوحدك في الحياه اللي إتظلم . . 

كل اللي وجعك إتوجع . . 

فأنت حاول تلحقك , 

لم التفاصيل البسيطه وكل حاجه بتسعدك . . 

وإقفل الدايره بهدوء 

وإن يسألوك إيه غيرك ؟ قول ده الطبيعي ! 

خبي ضعفك عن عنيهم , وابكي نص الليل براحتك . 

وخش رد علي الرسايل اللي وصلت من يومين . . 

مش مهم صاحبها مين . . 

واللي باعت : عامل ايه ؟ 

قوله عامل شاي وبضحك !

واللي باعت : انتو فعلاً سيبتوا بعض ؟ 

قوله أيوه . . ده الطبيعي 

كان طبيعي تخاف تكمل , 

حد زيي لا يُحتمل . . 

هي بنت أصول وياما إتحملت . . 

هي غابت , بس عادي هي حاضره , مهما غابت . 

بس ماتردش عليها , مهما بعتت . 

وإقفل الدايره بأدب 

وإن يسألوك إيه غيرك ؟ قول العشم . 

وخبي تفاصيل الفراق , 

وخبي برضو الإشتياق . 

وإتفادي تسمع إسمها . . فتحن عكس الإتفاق . 

وإقفل الدايره بدموع 

واوعي تنسي مين اللي قتلك . . 

واعترف , بعد ماتخلص بُكي إن كل ده بسببك ! 

وان يمكن , لوكنت قافل دايرتك . . 

كان يجوز . . كل ده , مكنش يحصل .