2017 - عبدالرحمن بلال
كل عام وانتم بخير . .
قالي صاحبي من يومين , السنه دي كانت كئيبه
مافتكرشِ عدي شهر ,
ولا حتي يومين تلاته بدون مصيبه
مافتكرش كسبت حد
مافتكرش خسرت حد
إلا يعني لو هاتسأل أو تلمح بالكلام ,
عن فولانه وعن فولان . .
ده انت تشهد ,
شوف تعبت ازاي عشانهم !
هو مثلاً , حد مافهمش الزعل . .
دخل الأيام في بعض ,
شبك الأحداث ببعض وقام ضاربني
تقولشِ يابني كلهم في الفتره دي , أخدوا ترياق الهبل !
حبوا جداً يبقوا نُطع . .
أما أنا . . ؟ أنا كنت مكسور وقتها من اللي إتعمل ,
لا كنت واعي لمين بيأذي ,
ولا كنت قادر أقول حبيبتي إلحقيني . .
الظروف إتكركبت فوق بعض فجأه فكونت
بدل الجدار ستين جدار مابيني ومابين الأمل .
فأعذريني . .
علي الليالي اللي قضيتها معاكي ساكت . .
وأعذريني لو في يوم قولتلك مليون بحبك وتاني يوم ماقولتهاش . .
وأعذريني إني شوفتك من البدايه طوق نجاة
وأعذريني بإن كان مفروض أسيبك بس أنا معملتهاش
وأعذريني إن عمري ما خدت موقف من عمايلك . .
وإن كل حياتي باظت واحده واحده وكان بسببك . .
ماتقوليش متوالية ثابته .
في البدايه خسرت نفسي
ثم قولي خسرت شغلي ثم صاحبي ,
بعدها مسحت الأغاني . .
كل حاجه خسرتها , والنهايه خسرتك إنتي .
كان طبيعي , والنهايه منطقيه . .
شوف يا صاحبي , معرفة الناس أذيه .
كل عام وانت بخير
إنجاز حقيقي إن احنا لسه مكملين . .
شهر تسعه . . ؟ أيوه فاكر عيد ميلادك ,
وفاكر انك عشته كله مُكتئب
فاكر انت شهر خمسه . . ؟
- كان جميل
ولا فبراير وصمته . . ؟
كنت عايش أحلي وقتك في السنه
لا حد فاكر نمرتك
ولا انت واعي لدنيتك ولا حتي جبت لصاحبتك هديه فيه .
أه يا صاحبي . . تحس إنه عام طويل ,
أطول من إنه يتحكي . .
طب ده أنا إمبارح لقيتني بقول بدون داعي ,
وأنا واعي ,
مابيعديش عليا الوقت غير ساكت . . يا إما أبكي ,
يا إما بنام عشان روحي ماتوجعنيش . .
وأنا صعبان علي حالي عشان ماعييش ,
سوا اللقمه اللي بقسمها علينا وانتي ماشبعتيش .
حياه كامله . .
بدور فيها عن فرحه ومفيش غيرك .
مفيش غير إني أكتبلك وماترديش .
وسيباني أموت مـ الدنيا في بعادك ,
وأنا في بعادك اللحظه بتقتلني ,
مفيش حاجه تفرحني , حقيقي مفيش .
متسألنيش يا صاحبي عن اللي تاعبني , عشان ما أكدبش .
وماتقوليش هاترجعلي , عشان ما أحلمش .
- صديقي اللي فارق واللي غاب أو بمعني أصح ,
اللي إتساب بدون أسباب .
انت مش سبب الوجع
وانت برضو مش السبب اللي هيداوي الوجع ,
لو في مليون إحتمال , هي دي بس الحقيقه .
هي حابه تقول كده , بس مش لاقيه طريقه .
كل عام وانت بخير .
