قصائد

الى الشخص اللي تاه منه الطريق فجأه وضاع من وقته وقت كتير عشان قصه سلام الله على العاشق لخلق الله مسيرك بُكره تلقى حياه وتنول اللي تتمناه .. مسيرك تلقى يوم صُحبه!

من وسط كل الناس اللي كان ممكن تكون وياه .. ساب الجميع واختار اللي مش حساه من وسط كل البنات اللي في سيلانترو ومن وسط كل البنات اللي كان ممكن تحبه ماشافش غيرها .. واختار يشاركها الوجع والأه

غيبي مهما تغيبي هفضل , شايف انك يوم هاتيجي وتلاقيني بحبك أكتر .. رغم كل البُعد فاكرك رغم يأسي ورغم يأسك لسه بحلم بيكي غيبي مهما تغيبي .. مش ناسيكي مهما بان إني ضعيف ياللي كنتي معايا معني للهدوء والضحك وجمال الربيع لما غيبتي يا حبيبتي إتحولت كل الفصول في حياتي لكأبة الخريف

وأدي الحياه راجعه تكشر وشها في وشي نصبت لي مسرح واديتني جايزة اللي مابيفهمشي اكتر انسان في الدنيا إتغفل من شهر نوفمبر !! اكتر انسان في الدنيا اتقال له إستحمل معلشي. اكتر انسان بيصدق ان الصُحبه لا يمكن تمشي واكتر انسان في الدنيا حقيقي مابينامشي.

وبترجع تسأل مع نفسك وبصوت عالي: انا ليه لوحدي؟ ليه رغم الزحمه اللي شايفها برضو لوحدي! مش كان في ناس هنا من فتره؟ مش كان في وعود وحجات مستاهله! مش كنت بعدت عن شُرب الزفت! مش كنت اتربيت واتآدبت ! هو انا طيب بضحك على نفسي !ولا انا بضحك على مين بالظبط؟

جدد بطاقتك قبل مايفوت الأوان جدد حياتك كل فترة عشان .. مفهاش يا صاحبي اي راحه مهما تعمل هي الحياه وده طبعها ! فبلاش تموت في بُعدها عشمان. لسه الليالي بتقتلك بهدوء لسه السجاير دورها جاي .. ماتفوق ! لسه الجوامع بتندهك بأيات من القرآن ولسه هى بتندهك في كل صوت كروان. وصوت نفسك مع نفسك مازال مخنوق!

وبحلم معاكي يا معنى السلام تدوم المحبه ويدوم الاحترام وتفضل ليالي الحياه منوره بصوتك وضحكة عنيكي الجُمال مفيش بعد منك ومهما يكون بظنك ملاك وان خانتني الظنون هايفضل وجودك وطعمك وروحك بتملى عليا الوجود والزمان ..

لم اللي فاكره من تجاربك واللي فاضل من صحابك والتيشرت النص كم إياه . .وغيب إقفل الدايره ببرود وإن يسألوك إيه غيرك ؟قول النصيب مهما تحكي مش هاتسمع غير هاتُفرج . . لو غرقت مش هاتلقى إيد تساعدك . . فـ انت حاول تلحقك واعرف إن الصحبه وقت واعرف ان الطيبه ذنب واعرف ان الجي أصعب وان اللي قابلك ع الطريق بكره يفوتك ع الطريق

كل عام وانتم بخير قالي صاحبي من يومين , السنه دي كانت كئيبه مفتكرش عدى شهر , ولا حتى يومين تلاته بدون مصيبه