زيارة إلي طبيب نفسي (الجلسة التاسعة) - عبدالرحمن بلال
دكتور
العالم شكله إتجن
العالم بطّل فن !
بطّل يفهم .. بطّل يكتب
بطّل يهتم
افتح نشرة أخبار 9 وانت هاتتغم
فات سنه ع الحرب اللي ماحدش عارف امتي هاتتلم
حتي اصحابها !
حتي اصحابها يا دكتور مسّخوا والله معني الدم !
وضريبة الدم !
العالم حَب تريند الهم
العالم حَب تريند الدم
المُهم !
دكتور انا مش عارف أبطل أحلم
ولا عارف أتلم !
ولا عارف أبطل حُب الفن وأهل الفن !
ودي أخبار مش هاتشوفها في نشرة تسعة
ولا حتي في بوست ولا تويته !
مش عارف أبطل حُب ولا عارف أبطل شِعر
ولا قادر أوطي المزيكا !
لو كنا في عالم تاني يا دكتور ..
كنت هاتسمع في النشرة أخبار ع الشغل
لو كنا في عالم عادل
كان الكُل يحب الكُل !
لو كنا في عالم حُر
كان يبقي حقيقي صباح الفُل , ومساء الفُل.
كل الأحداث العالميه أرخص من سعر الملوخيه
والطعميه .. وسعر الكشري .. وسعر الترمس من النوع المُر !
من سعر سيجاره تعّفر بوقين !
أرخص والله من تذكرتين حفله لـ لينا!
أرخص من أرخص شئ فينا
أرخص من كل اللي أذينا ومن مصدر خوف اللي مالينا !
كل الأحداث العالميه
بتبقي قوية لو كنت وحيد
وتبقي طريه لو شارب ويد !
كل الأخبار حاجه قديمه
كل الأخبار حاجه حزينه
لو سهران , ركز في السهره !
العالم اسم ملوش معني إياك تديلّه أهميه.
إياك تلعب وياه لعبة مين فينا اللي ضحية!
العالم لما تموت , هايفوت ويقول هلفوت ..
العالم موجود جوانا يا دكتور وفي شجر التوت
العالم معناه مين جنبك ؟
مين اللي بيزعلك ؟
مين اللي بينتظرك !
العالم عُمره ما كان أخبار ع الحرب النوويه !
العالم في السوق ..
بيبيع محصوله من الأيام
ويجيب مخزونه من الأحلام
وينام ساعتين قبل ما يصحي يكمل توهان !
العالم مات أول ما اكتشف الدُخان
العالم حربه مع السرطان !
مش ويا بلاد بتهد بلاد والإسم جيران !
العالم طفل صغير بيروح كُتاب !
أو بنت وواد في كتب كتاب !
العالم أحلي بدون أخبار
العالم أحلي مع الأشعار
العالم عاصي شهور وفي رمضان تاّب
العالم جوانا يا دكتور بيسب الدين للإرهاب!
أياً كان شكل الإرهاب.
العالم قعدة مع الأصحاب ومساعدة ناس أغراب
وفي عين ليلىّ وأشباه ليلىّ
يا ترا أجدادنا زمان كانوا متابعين نشرة تسعة ؟
