الحب في زمن الواتساب - عبدالرحمن بلال
الحب في زمن الواتساب
الواد إتساب . .
والبنت إكتفت إنها عملتله بلوك
ومحدش فيهم بقي فاهم ايه الأسباب . . !
الواد من شهرين بدء الشك ,
يبعت في كلام وبيتشاف , ومفيش رد . . !
ايه اللي بيحصل بالظبط . . ؟
أنا كنت مجرد ما أبعت كلمه ترد بكلمه . .
من غير ما أسألها كانت تحكيلي تفاصيل يومها ,
مش عارف قابلت مين في طريقها ومين مضايقها ,
ومين في الشغل مطلع عينها ,
بالتفصيل كانت تحكيلي وكنت أحكيلها . . !
ايه غيرها . . ؟
وليه ما بقتش ترد عليا ؟ غير بمزاجها .
فين ضحكتها , وفين فرحتها أما تكلمني . . ؟
أكيد بتخوني .
يمكن قابلت واحد تاني عِرف يشاغلها ,
محتاج منها شهور علشان يقعد يحكيلها ,
وهي أكيد حبت تحكيله وهو سمعها .
مش معقول هاتعدي اليوم من غير ما هاتضحك !
مين دلوقت بترغي معاه ؟
ليه بتحاول تبعد عني ؟
زهقت مني . . !
يمكن أخر مره أقابلها كنت مكشر .
قاعد سرحان مش بسمعها , كنت بفكر !
عندي مشاكل تانيه يابنتي .
بس ده وقتي . . !!
لما تشوفني المفروض تفرح
لما أبعتلك مالك ؟ تشرح
احكي معايا ,
مانا بحكيلك كل حجاتي !
عارف شغلي وعارف عيلتي وعارف عني كل حياتي ,
حتي أصحابي .
مره بعدي , مره بكبر , بس ان تكون دي طريقتك !!
لأ مش هاقبل .
بص هاقولك . .
أنا حاسه ان انت إتغيرت ,
مش نفس الشخص اللي عرفته ,
كنت زمان مشغول أكتر بكتير من دلوقت ,
وكنت تملي تلاقي الوقت عشان تقابلني .
أكيد بتخوني . .
مش معقول هاتعدي اليوم من غير ما هاتضحك !
مين دلوقت بترغي معاه . . ؟
أخر مره قابلتك فيها كنت قاتلني ,
شوفت في عينك بنت جديده وكام تنهيده , شوفتني بخرج منك فيهم .
كنت معاك وكأني وحيده . .
من شهرين وأكتر مرعوبه . .
كل مكالمه بشوفها نهايه ,
بسأل عنك وانت بعيد ,
وأسأل عني وانت معايا .
كنت قاتلني ,
وأنا من كتر ما كنت بحبك ,
قولت أديلك فرصه تسيبني .
انتي عبيطه ؟
أنا والله بحبك جداً
مش متخيل أصلاً أسيبك , أو تسيبيني .
لو كان فعلاً بتحبيني !
صدقي إني بحبك جداً ,
واني هسامح نفسي بشرط ,
لو قولتي انك هاتسمحيني .
خيالات . .
لا الواد قال حاجه ولا البنت ,
لسه الواد مسجون في الشك ,
وهي مازالت عامله بلوك .
اللي قريته مجرد مشهد وارد يحصل لو يتقابلوا .
وارد برضو انه مايحصلش , لو بعنيهم بس إتعاتبوا .
الملعون الأخضر قادر انه يدمر علاقات كامله . . بس بكلمه
الحب في زمن الواتساب , ملوش تقدير .
والغلطه في زمن الواتساب ملهاش تبرير .
أنا بتخيل قيس لو عايش لسه معانا . . وبدون ليلي ,
وبكل قواه العقليه . .
ووصله ان في قصص حب بتخلص بس بـ حصل خير .
أنا بخمن . .
قيس لو عايش لسه معانا ,
كان برضو إتجنن .
