الحياة أسرار - عبدالرحمن بلال
بلاش تبعدها تاني عنك
دي بتحبك
بتطمن أوي جنبك . .
وبتحسك أبوها وضهرها وعزوتها في الدنيا
في ناس قبلك مكنش يصح تقابلهم , وقابلتهم
ولا تقرب في يوم منهم , وحبيتهم !
حكاوي جراح وخوف بينهم . . وعايشه في حرب بسببهم . .
حجات إتأثرت بيها صحاب خسرتها وقتيها
دموع من غير ميعاد ووجع بيقتل كل يوم فيها .
بلاش تسألها مين وجعك !
مسيرها أكيد هاتحكيلك
أهم من السؤال إنك , تطمنها . . تنسيها
وسامح ضعفها وقدر
مكنش يصح تستغرب
خوفها من حجات تافهه وحتي كلامها عن غيرك !
دي بتحبك . . لكنها لسه موجوعه
دموعها حكاوي مكتومه
حجات انت ماتعرفهاش ولا بالسهل تنساها .
الحياة أسرار .
في ناس قبلك , مازالت عايشه جواها
وبتدمر مشاعرها . .
سابوها في عز فرحتها
وخانوا عهود كانت بينهم
وسابوا في نفسها روحهم .
طبيعي إتأثرت بيهم وشربت من ندالتهم !
فـ لو باعت في يوم عادي مهي إتباعت زمان منهم
وجودك في الحياه معاها كأنه قمار !
فـ لو باعت في يوم هي هايبقي غلبها نُسختهم .
وصدقني . . هاتفضل برضو بتحبك . .
وهتحاول كتير ترجع وهتقولك . .
في ناس قبلك مكنش يصح تقابلهم
مكنش يصح تأمنهم . .
وكانوا بيفهموا خوفها ويتمنوا الرضا ترضي !
وخانوا وعدهم فجأه .
حيرتها وغُلبها وياك . . مجرد خوف تكون لعبه !
يدوب إتغيرت أسماء , وهي لسه علي حالها .
هتاخد وقت صدقني وهاتبقي تمام
حياتها الأن . . مجرد خوف من الأيام .
وهايعدي ,
وصدقني , هايبقى الوضع كما هو ,
لحد ما تصحي يوم حاسه ,
ان اللي حصل منهم .
معاك , ملوش مكان قدام .
