بتنسوا ازاي؟ - عبدالرحمن بلال
الناس بتحارب تقنعنا ,
ان احنا نأمن بالوحده . .
وان احنا نفارق بالكُتره ,
وان الفطره .. ان احنا نقابل بالأحضان .
وان الأيام قادره تنسيك لو ايه شوفته . .
لو مين باعك , لو مين خانك . .
قادره تنسيك حتي جنانك . .
قادره تنسيك الوقت معاهم كان ازاي !
وان الجاي , لا يساع أكتر من أغنيه يجوز تعجبكم
أو توجعكم في نفس الوقت .
أو بالصدفه , يجمعكوا كافيه في زيارتك ليه أول مره
فـ تعوذ تجري , تلاقيك قاعد تحكي معاهم تفاصيل معرفتك بالبيره والبار والرقص !
وان اللي مصاحبك لسه من الماضي , كوباية الشاي .
بتنسوا ازاي ؟
نفسك تسألهم بس جبان . .
متضايق ليه من تسريحتك ؟
من يومك بتنعكش شعرك وبتجري عشان تلحق توصل
إشمعني معاهم بتدقق وبتتمني تحلي ملامحك !
الحرب ما بينك وما بينك دايماً بتبان .
اسألهم بس بينسوا ازاي ؟
يمكن يفيدوك !
يمكن في طريقه ماتعرفهاش !
اسأل يمكن تخلص مـ الهم . .
يمكن في المره الجايه تشوفها ماتندهاش ,
انت الخسران .
