أحلى بنت - عبدالرحمن بلال

بإعتبارك أحلى بنت أنا شوفتها من يوم ما جيت الحي 

وعلي إعتبار إني أما شوفتك ضلمت كل الوشوش . . وشوفتك إنتي ضي  

وعلي إعتبار إني قابلت وشوفت ياما ناس كتير . . 

حابب أقولك إنك ملكشِ زي . 

ياللي غيبتي وانتي عارفه ان انا هحاول أجيلك . . 

دي طريقتي وده طريقك . . 

مش حكاية كلمتين ولا حتي 100 مليون قصيده 

انتي أحلى من كلامي ومن قصايدي ومن مشاعري 

انتي أحلى من ليالي العيد ومن أيام طفولتي . . 

انتي عندي أغلى من كل اللي عندي , 

مش بسيطه الكلمه دي ! إفهميها لو سمحتي . 

أما صدفه . . كنتي أحلى واحده يومها لما شوفتك , 

قولت هاتقل , بس فجأه لقيتني بنده ! 

وانتي جيتي وادتيني أمل أكمل , 

وكنتي أجمل , لما كلمتك يوميها عن حياتك . . 

وانتي قولتي حجات كتيره شدتيني لحكاياتك . 

وبعدها رجعتي لغيابك . . 

ورغم انك مش قريبه مني لكن , كنتي حاضره . 

ياللي غيبتي وانتي عارفه ان انا هحاول أجيلك . 

كنت بتخيل ملامحك وابتسامتك وخناقاتك , 

والمشاكل اللي كانت يوم هاتحصل لو في يوم حبيت جنابك 

وذكرياتك ع اللي كانلك واللي سابك , 

واللي بيحاول يساعدك واللي بيحاول يهدك واللي زيي مش فاهملك أي حاجه في أي حاجه . 

ياللي غيبتي وانتي عارفه ان انا هحاول أجيلك . 

بقعد أتخيل في كذا مليون حكايه , واللي رابط بينها حاجه واحده بس . . 

ان انتي أحلى .