عيال الشارع - عبدالرحمن بلال
الصُحبه زمان كانت عزوه . .
كانت لسه بتوهب فرحه
كان اللعب معاهم يحلى وكان طعم الشارع أحلى .
نبدء نتجمع ع المغرب
ونروح بعد صلاة الفجر .
كان عندك حلم ,
كان عندك سر , قبل ما يتحول مليون سر
كان عندك صبر ,
كنت بتتخانق مايهمكش أثار الجرح . .
كنت ساعات بتحس بفرح ,
أو تحديداً , كنت تملي تحس الفرحه في صوت اللمه .
شوف دلوقت . . !
الأيام لفت في فلك كوباية شاي وسيجاره
اختفي صوت لعبك مـ الحاره
وطلع صوت دابحه الدخان . .
بيناكف ويزعق لولاد الجيران .
كنت زمان تلعب ماتحبش حد يزعقلك
تتخانق ويا اللي يحاول ينكر حقك !
وكأن الشارع ليك إتباع !
كنت بترهبهم بالأتباع !
شوف دلوقت . . ازاي بتزعق في الأطفال !
شوفت ازاي بيجيبوا صداع ؟
- لسه الشارع زي ماهو ؟
شكلاً أه , طعماً لأ
- وانت ازيك ؟
انا مخنوق مـ الشارع جداً ,
كاره صوت اللمه . .
عايز الحق . . ؟
لسه الشارع زي ماهو !
أنا بس اللي بحاول أتفلسف ,
علشان أثبت , ان حكاوي الشارع أيام حكمي كانت أحلى
أنا كنت كبير الشله ,
كان إسمي بيتردد في اليوم 100 مره
كنت حكيم جداً وفتوه ,
شوف دلوقت ! مش برتاح غير في العزله .
بقت الناس بتشوفني تقولي ازي ظروفك ؟
ليه ماعدناش بنشوفك ؟
مش متضايق , انا مبسوط جداً جوه .
مش هانكر , بفرح لما الناس تحكيلي مواقف عني .
لسه الشارع زي ماهو ,
سيبك مني .
لسه عيال الشارع بره .
