اقفل الدايرة
لم اللي فاكره من تجاربك
واللي فاضل من صحابك
والتيشرت النص كم إياه . .وغيب
إقفل الدايره ببرود
وإن يسألوك إيه غيرك ؟قول النصيب
مهما تحكي مش هاتسمع غير هاتُفرج . .
لو غرقت مش هاتلقى إيد تساعدك . .
فـ انت حاول تلحقك
واعرف إن الصحبه وقت
واعرف ان الطيبه ذنب
واعرف ان الجي أصعب
وان اللي قابلك ع الطريق بكره يفوتك ع الطريق
هون عليك
لا انت أول حد يزعل ولا حتى ده أخر زعل
لسه هاتشوف مـ الزمن ,حجات يجوز لا تُحتمل
فلما هاتفكر في بكره وتترعب وتبص حواليك ماتلقيش غير الوجع
وتخاف ترد علي إتصالها ليتعبك
إعرف إن ساعتها بس ,إن حزنك إكتمل
فإضحك بقى ,منتاش لوحدك في الحياه اللي إتظلم
كل اللي وجعك إتوجع
فأنت حاول تلحقك
لم التفاصيل البسيطه وكل حاجه بتسعدك
وإقفل الدايره بهدوء
وإن يسألوك إيه غيرك ؟ قول ده الطبيعي
خبي ضعفك عن عنيهم ,وابكي نص الليل براحتك
وخش رد علي الرسايل اللي وصلت من يومين
واللي باعت : عامل ايه ؟ قوله عامل شاي وبضحك !
واللي باعت : انتو فعلاً سيبتوا بعض ؟ قوله أيوه
ده الطبيعي
كان طبيعي تخاف تكمل
حد زيي لا يُحتمل
هى بنت أصول وياما إتحملت
هى غابت , بس عادي
هى حاضره , مهما غابت
بس ماتردش عليها ,مهما تبعت
وإقفل الدايره بأدب
وإن يسألوك إيه غيرك ؟قول العشم
وخبي تفاصيل الفراق وخبي برضو الإشتياق
وإتفادى تسمع إسمها . . فتحن عكس الإتفاق
وإقفل الدايره بدموع
واوعى تنسى مين اللي قتلك .
واعترف , بعد ماتخلص بُكى
إن كل ده بسببك !
وان يمكن , لوكنت قافل دايرتك
كان يجوز . .
كل ده , مكنش يحصل.
عبدالرحمن بلال