النص الفاضي من الكوباية المكسورة
إلى الشخص اللي تاه منه الطريق فجأه
وضاع من وقته وقت كتير عشان قصه
سلام الله على العاشق لخلق الله
مسيرك بُكره تلقى حياه
وتنول اللي تتمناه ..
مسيرك تلقى يوم صُحبه!
وأما بعد ..
مفيش أصعب على الانسان سوى خسارة حتت منه
او انه يضيع مع الأيام وهو مشاكله مش ذنبه
او ان اللي زمان مشيوا يغيبوا وعمر ما يحنوا
ساعتها بس بيصدق بإن الدنيا دي مقلب
وان في شئ سرق عمره!
ساعتها الحزن بيهاجمه وبيغيب عن عنيه الضي
يداوي جرحه مع نفسه ولا تسمع في يوم الأي !
بيخرج من حياه عاشها وتبدأ رحلته مع الجي!
مع الليل اللي بيصاحبه
وكام اغنيه بتسليه ..
يجيله الكون مادد له ايديه وهو مفيش حاجه تنسيه ولا تكفيه !
بيغرق كل يوم وحده ويبعد كل يوم أمتار ..
يبان حزنه علي شكله وتحت عنيه بيحكي دمار !
وبيبطل يقول حكايات وتبدأ سكة الأشعار !
يا ست المجنونين في الارض
انا لا حول ولا قوة في موضوع ان انا وانتي نكون مع بعض !
لا كنتي مشكله ولا كنت.
بقيتي مشكلة فـ بقيت !
دخلنا اللعبه وخسرنا
بكيتي عليا في الأخر .. وفي الأخر عليكي بكيت !
عبدالرحمن بلال