ام كلثوم
غيبي مهما تغيبي هفضل ,
شايف انك يوم هاتيجي
وتلاقيني بحبك أكتر ..
رغم كل البُعد فاكرك
رغم يأسي ورغم يأسك لسه بحلم بيكي
غيبي مهما تغيبي .. مش ناسيكي
مهما بان إني ضعيف
ياللي كنتي معايا معنى للهدوء والضحك وجمال الربيع
لما غيبتي يا حبيبتي إتحولت كل الفصول في حياتي لكأبة الخريف
من يومين الشمس كانت حلوه جداً ..
و ام كلثوم قاعده توصف حالتي وتقول فكروني ♫
والحقيقه ان الصحاب ولا كلموني في مره عنك
ولا حتي حاولوا يصالحوا بينا ويرحموني !
ملعون صُحابنا يا حبيبتي
ملعون شياطين البشر اللي نصحوني اني أنسي ..
ام كلثوم الوحيده اللي فاهمه واللي حاسه ايه اللي فيا
وام كلثوم للأسف مابقاش في إيدها
تصحي في عيونك حنينك لإبتسامتي
فـ انتي غيبي , واسمعي الناس وحكاياتهم
واستمري في الغياب ..
ام كلثوم برضو قالت : بعيد عنك حياتي عذاب ♫
ايه اللي أقوله تاني أكتر يوصف اني ازاي بعاني ؟
صحي وجعي يا ام كلثوم بالأغاني
كل ليلة بقول هبطل أسمعك بس برجع أحن تاني
وجعك بشوفه ما بين كلام أغنيتك علي شكل تنهيده
وأنا برضو زيك يا ام كلثوم الحقيقه ..
وجعي مايبانش إلا علي هيئة قصيده .
غيبي مهما تغيبي هفضل بكتبك
وأتمنى تقريني .
شوفي ايه يرضيكي وانا هتحملك
وأتمنى تبقيلي
وعدي ان طول عمري احبك مش كلام معناه اني عايزك ترجعيلي .
انتي عايشه معايا أصلاً مهما غيبتي
ام كلثوم مهما قالت ..
مش هاتوصف حاجه من اللي حاسسها ليكي
لو غيابك عني غصب ومش بإيدك .. حبي ليكي مش بإيدي .
لو مش بحبك ..!
كانت ام كلثوم تبقي حاجه مُمله جداً
"زي كل حياتي بعدك"
ام كلثوم لسه عايشة .. لأجل اللي زيي يفضلوا يحبوا اللي زيك
ده المؤكد والحقيقي
غيبي مهما تغيبي .. في خيالي عايشه كل يوم
الله يردك عن قريب
أو يجازي ام كلثوم.
عبدالرحمن بلال