2017

كل عام وانتم بخير 

قالي صاحبي من يومين , السنه دي كانت كئيبه

مفتكرش عدى شهر , ولا حتى يومين تلاته بدون مصيبه

مفتكرش كسبت حد 

مفتكرش خسرت حد

إلا يعني لو هتسأل أو تلمح بالكلام ,عن فولانه وعن فولان . .

ده انت تشهد , شوف تعبت ازاى عشانهم !

هو مثلاً , حد مافهمش الزعل . .

دخل الأيام في بعض , 

شبك الأحداث ببعض وقام ضاربني

تقولش يا بني كلهم في الفتره دي ,أخدوا ترياق الهبل 

حبوا جداً يبقوا نُطع . .

أما أنا . . ؟ 

أنا كنت مكسور وقتها من اللي إتعمل ,

لا كنت واعي لمين بيأذى , ولا كنت قادر  أقول حبيبتي إلحقيني . .

الظروف إتكركبت فوق بعض فجأه فكونت

بدل الجدار ستين جدار مابيني ومابين الأمل .

فاعذريني . .

ع الليالي اللي قضيتها معاكي ساكت . .

واعذريني لو في يوم قولتلك مليون بحبك 

وتاني يوم ماقولتهاش . .

واعذريني اني شوفتك من البدايه طوق نجاة

واعذريني إن كان مفروض أسيبك بس أنا معملتهاش

واعذريني إن عمري ما خدت موقف من عمايلك . .

وإن كل حياتي باظت واحده واحده وكان بسببك . .

ماتقوليش مُتتاليه ثابته .

في البداية خسرت نفسي ثم قولي خسرت شغلي ثم صاحبي , 

بعدها مسحت الأغاني . .

كل حاجه خسرتها , والنهايه خسرتك انتي .

كان طبيعي , والنهايه منطقية . .

شوف يا صاحبي ,معرفة الناس أذية .

كل عام وانت بخير

إنجاز حقيقي إن احنا لسه مكملين . .

شهر تسعه . . ؟

أيوه فاكر عيد ميلادك , وفاكر انك عشته كله مُكتئب

فاكر انت شهر خمسه . . ؟

كان جميل

ولا فبراير وصمته . . ؟

كنت عايش أحلى وقتك في السنة

لا حد فاكر نمرتك ولا انت واعي لدنيتك

ولا حتى جبت لصاحبتك هديه فيه .

أه يا صاحبي . . تحس إنه عام طويل , 

أطول من إنه يتحكي . .

طب ده أنا إمبارح لقيتني بقول بدون داعي وأنا واعي

مابيعديش عليا الوقت غير ساكت . .يا إما أبكي 

يا إما بنام عشان روحي متوجعنيش . .

وانا صعبان عليا حالي عشان معيش 

سوى اللقمه اللي بقسمها علينا وانتي ماشبعتش

حياه كامله . . بدور فيها عن فرحه ومفيش غيرك 

مفيش غير إني أكتبلك وماترديش .

وسيباني أموت مـ الدنيا في بعادك ,

وأنا في بعادك اللحظة بتقتلني ,

مفيش حاجه تفرحني , حقيقي مفيش .

متسألنيش يا صاحبي عن اللي تاعبني ,عشان ما اكدبش 

وماتقوليش هاترجعلي ,عشان ما احلمش

صديقي اللي فارق واللي غاب 

أو بمعنى أصح , اللى اتساب بدون أسباب 

انت مش سبب الوجع

وانت برضو مش السبب اللي هيداوي الوجع 

لو في مليون احتمال , هي دي بس الحقيقه 

هي حابه تقول كده , بس مش لاقيه طريقه 

كل عام وانت بخير.

عبدالرحمن بلال