وبحلم معاكي
وبحلم معاكي يا معنى السلام
تدوم المحبه ويدوم الاحترام
وتفضل ليالي الحياه منوره
بصوتك وضحكة عنيكي الجُمال
مفيش بعد منك ومهما يكون
بظنك ملاك وان خانتني الظنون
هايفضل وجودك وطعمك وروحك
بتملى عليا الوجود والزمان ..
جميله في كل العيون وفي عنيا
هديه بعتها القدر فجأة ليا
تحلي العُقد والبلاوي اللي فيا
وتهديني حب وامل واهتمام
يابختي عشان بختي كان اني أحبك
يا بختك عشان قلبي سلم لقلبك
يا بخت الحياه اللي فيها اللي زيك
صباحك جميل يا معاني الأمان
بقدم حياتي ياريت تقبليها
بنفسي وروحي وكل اللي فيها
يدوب بس أعبر بحاجه وأقدر
وتأكيد محبة وعربون غرام
بحبك يا أحلى من الشعر عندي
يا صاحبة في عز الهموم واقفه جنبي
يدومك في قلبي، يدومني لقلبك
تدوم المّعزه ويدوم الكلام.
عبدالرحمن بلال