من البيت للرف
تسمع يا صاحبي عن اللي حَب مَطّلش !
واللي راح السوق يجيب برقوق رجع بـ خيار !
تعرف يا صاحبي حد عارف سر بس متكلمش !
أهو ده الصراحه في نعيم الجنه والله مع الأبرار.
وأدي الحياه راجعه تكشر وشها في وشي
نصبت لي مسرح واديتني جايزة اللي مابيفهمشي
اكتر انسان في الدنيا إتغفل من شهر نوفمبر !!
اكتر انسان في الدنيا اتقال له إستحمل معلشي.
اكتر انسان بيصدق ان الصُحبه لا يمكن تمشي
واكتر انسان في الدنيا حقيقي مابينامشي.
احكيلي يا صاحبي:
في حد سألك مـ البنات هو انت بتحب البنات ؟
في حد جابلك قهوة واتكلم معاك ع الإعلانات ؟
في حد لمّحلك بغنوه لـ عمرو ؟
عمرك كتبت في حد شعر ؟
في حد عمره أقنعك ان بمزاجك تتركن ع الرف ؟
في حد بيصحيك يوماتي ولا نومك يعني موت !
في حد بيقولك كلام بعنيه!!
ولا انت مبتفهمش غير بالصوت؟
في حد عندك في المكان ولا المكان صدى
في حاجه حلوه في يومك ولا بيتقضى !!
في بنت مره صرخت فيك دون سبب ؟
وسمعت منها كلام عليك مش صح!!
بتسيبها تبعد ولا لازقة ؟ بتخاف تموت في بُعدها من الجرح ؟
حافظ سنين الألبومات ولا بالبركه !
عارف طريق البلكونات ولا بالصدفة !!
عمرك شربت مخدرات علشان توقف غُلب
عمرك بّكيتك علشان توقف شُرب ؟
عمرك رفضت او اترفضت ؟
في حد حبك لجل حُبك للقطط والحيوانات
في حد عمره شبهك بالكلب ؟
ولا انت عايش يوم بيومه ؟
في حد عمره لبسك تُوبه ؟
في حد مره أنقذك ثم رماك في بحور همومه ؟
في حد سَجنك في الحياه وبعيونه كّتفك !
في حد حبك ولا حتي أنصفك ؟
في حد بتشاركه الليالي ولا غيم 🌧️
جربت عمرك وجع الاسامي اللي بتبدأ بحرف الـ ع ؟
انا جربت!!
احكيلك ؟
في حد مره فهمك ان الزمن محبوس هناك
في قصايد الأبنودي وأغنية "علمني هواك"
عمرك قِبلت الكدب وتكيفت !!
عمرك قابلت الحب وتعذبت !!
عمرك واجهت !! ولا بتهرب لما يقولولك اجري!!
انا حد جاي من التسعينات وحكاوي جدي.
تبدأ حكايتي مع الوجع بوجع !!
وبتنتهي دايماً بإن العمر يمكن لسه فيه بدري.
بتفهم في الفراق !!
تعرف اغاني الست ؟
تعرف تحافظ ع الاصول في الحب ؟
بتعرف تنط ؟ ولا بتخاف مـ الوجع !!
في حد خانك وانت كنت معاه جدع ؟
في حد عزمك مره علي حفله ؟
في حد حبك مره علي غفله ؟
في حد قال اسمك لحد ؟
بتخاف من أخر الحدوته و بتتوتر من يوم الحد ؟
تعرف جوابات الاسطى حراجي القط ؟
تعرف لينا شماميان ولا مُغفل ؟
بتعرف يا صاحبي تنط؟
عمرك دمعت كلام غنوة !
عمرك جمعت حجات نادرة ؟
عمرك خبيت علي نفسك سر!!
عمرك جربت تموت مـ الضغط !
ولا انت يا صاحبي يدوب عايش من البيت للرف !
انا يا صديقي جربت الحب !!
في قول أخر: جربت الرف.
وكتبت الشعر ..
البنت اللي انا مش وياها اجمل حاجه فيها الشَعر
والليل وياها ملوش وصف
بنت تحسسك انك نفسك ترجع للفصل
بنت تخليك تتمنى حجات وتبطل لعب !
بنت توديك والله بكلمه البحر وتخليك راجع متكيف،
انك واخيراً هاتكون ع الرف.
انا جربت يا صاحبي كتير مشاوير
وتعودت علي التأخير ..
وسهرت ليالي مع القهوة وكتبت قصايد مش حلوة
عن شارع فيصل والمتحف والقصر اللي ماكنتش عارفة والهوا ع النيل !!
انا صاحب الليل المرمي لوحده في عز الليل
وزبون القهوة اللي بشوفها
وأسير البنت اللي أحضنها
والمؤمن اللي ماليه الشك بشكل كبير
انا شوفت الديب والسلعوة وبعاني من الخوف والوحدة
والشخص اللي تحب تقضي معاه وقت كتير.
بطل العالم في التأخير
بطل الحكايات المهزوم
الاستاذ النايم على كتف الدنيا ومتسّلطن الجاذب للأزمات ولـ خوم النوم.
الواد الچان !!
اللي بيتقال له بحبك من مرضى !!
وبيجذب اي زبالة تقابله
وبيرفض اي جميلة تعاتبه
وفي نفس الوقت هو الغلبان.
معقول كل دي غلطات انا حبيتها ؟
معقول انا روحت بنفسي لباب بيتها ؟
مانا عارف اني مكنتش هارجع غير بوجع وحجات تانيه من هذا اليوم انا خبيتها.
جربت يا صاحبي تنام مقهور
مش عارف ليه رغم ان انا عايش في الضلمة عمري ما حبيت غير اللي يحب ينام في النور !!
يمكن علشان يشبهوا امي ..
يمكن علشان ببقى لوحدي !!
بالليل والناس نايمين ، قتلني الحب كذا مره.
يمكن علشان يشبهوا همي !!
يمكن علشان يشبهوا اوضتي !!
انا كل ما اقول أهي ضحكت أهي تطلع خيبتي !!
يمكن علشان بيخافوا مني !!
طب ليه مش بيخافوا يبيعوا ؟
هو انا مضمون للدرجه دي !!
ليه كل ما احوش من الايام حبه يضيعوا ؟
الواد الچان ..
اللي اتقال له بحبك مـ ناس حريفة خذلان
عمره ما جرب شئ بعديها ..
عمره يا صاحبي ما اتمنى يكون او يبدأ يوم غير بيها
عايش مليان بوجع وقرف
سايب علشانها البيت والويد
قرر يعملها ويبقى بعيد
واذا كان الموضوع فرض ولا مفر
يبقي هايفرق ايه الوقت،
اذا كنا في بيت او حاضنين عقاربنا وقاعدين ع الرف.
صب لي واشرب واحكيلي : جربت وجع برج العقرب ؟
عبدالرحمن بلال